13/03/2026 - 27/09/2026

O CGAC acolle a primeira exposición individual nun museo español da artista alemá afincada en Berlín Alexandra Ranner. A mostra reúne unha selección de obras realizadas desde 2003 ata a actualidade a través de distintos formatos como fotografía, escultura, instalación ou vídeo.

A obra de Ranner explora cuestións como a soidade, o colapso, a indefinición dos espazos ou a tensión entre pasado e futuro mediante escenas protagonizadas por figuras humanas, animais, arquitecturas, interiores e paisaxes. Cunha atmosfera marcada pola ambigüidade, o misterio e a estrañeza, a exposición propón unha experiencia inmersiva que cuestiona os límites da percepción e da interpretación.

Influída pola pintura renacentista e barroca e por autores como Kafka ou Beckett, Alexandra Ranner combina referencias da historia da arte cunha mirada contemporánea atravesada polo humor, o sarcasmo e o absurdo.