13/11/2026 - 13/11/2026

O Outono Códax Festival continúa a súa XVI edición cunha noite de sons inclasificables e enerxía desbordante protagonizada por HENGE e Oh! Gunquit.

Dende planetas afastados, ou polo menos así se presentan, chegan HENGE cunha proposta que escapa a calquera etiqueta: un universo sonoro a medio camiño entre a rave e o rock progresivo, cargado de enerxía, imaxinación e humor. A banda presentará Journey to Voltus B (2025), un traballo que confirma o seu carácter futurista e un directo envolvente no que música, espectáculo e mensaxes de esperanza se dan a man.

Pola súa banda, Oh! Gunquit achegará a súa mestura explosiva de psych-surf, garage-punk e rock and roll exótico. O quinteto londiniense, de formación cosmopolita, combina influencias de bandas como The Cramps ou The B-52’s cunha identidade propia marcada polo espírito das películas de serie B, as road movies e unha posta en escena chea de enerxía.

Unha noite de psicodelia, festa e rock and roll sen límites.