14/09/2026 - 27/09/2026

Do 14 ao 27 de setembro, a Universidade de Santiago de Compostela celebra as xornadas de inicio de curso #BenVidaUSC nos campus de Santiago e Lugo, cun amplo programa de actividades culturais, deportivas e de benestar dirixidas ao conxunto do estudantado.

A programación inclúe concertos, visitas guiadas, propostas de creación escénica e danza, obradoiros de pandeireta e baile tradicional, foliadas, campionatos e aulas deportivas, así como actividades relacionadas co benestar emocional, a igualdade, a participación e os diferentes servizos que ofrece a Universidade.

En Santiago, a Praza de Mazarelos acollerá o 24 de setembro os concertos de Lg1do e Xalundes. En Lugo, o 16 de setembro, será a quenda de Alddara e Lg1do, na explanada da cafetaría da Escola Politécnica Superior de Enxeñaría.

A maioría das actividades son de acceso libre e gratuíto para a comunidade universitaria. Algunhas propostas teñen límite de prazas e requiren reserva previa.