16/07/2026 - 30/09/2026

A Casa do Cabido acolle a exposición “A cidade que se soñou a si mesma. Obras e proxectos na Compostela rexionalista”, unha mostra que percorre a transformación arquitectónica e urbanística de Santiago de Compostela nas primeiras décadas do século XX.

A través de planos, fotografías, documentos e debuxos, a exposición presenta tanto edificios construídos como proxectos que nunca chegaron a executarse, permitindo descubrir como se foi configurando a identidade arquitectónica da cidade. Entre os seus principais atractivos destaca unha recreación virtual en 3D do proxecto que Antonio Palacios concibiu en 1932 para unir a Porta Faxeira coa Praza do Obradoiro.

Comisariada por Jesús Ángel Sánchez García e Santiago Rodríguez Caramés, a mostra pon en valor o legado dos arquitectos que contribuíron a definir a singularidade arquitectónica de Compostela.